هتلاقي (رسالة نصية) جاية من WhatsApp
ومكتوب فيها
Verification Code
اللي هو عبارة عن 6 أرقام
ولأن برنامج الواتس أب شغال عندك عادي ومفيش مشكلة , فأنت بشكل طبيعي هتتجاهل الرسالة
بعدها بشوية , هتلاقي واحد تعرفه من أصحابك أو ماتعرفوش أوي (من جروب بينكم علي الواتس) باعت لك علي الواتس أب رسالة وبيقولك: "أنت بعت لي الرسالة دي ليه !!؟"
وهتلاقيه باعت لك إسكرين شوت لرسالة شبه رسالة الـ
Verification Code
اللي وصلتك من شوية
فأنت هتقوله: " أنا مابعتش لك حاجة .. ده أنا كمان جالي رسالة زيها من شوية"
ولإثبات حسن نيتك , فأنت بسذاجة هتعمل إسكرين شوت للرسالة النصية اللي جاتلك وهتبعتهاله
فهيرد ويقولك: "طيب أوعي تدوس عليها .. دي ممكن تكون فيروس أو هاكر"
إيه بقي اللي حصل فوق ده !!؟
اللي حصل هو إن اللي كان بيكلمك مكنش صديقك ولا حتي الشخص اللي أنت موجود معاه في جروب الواتس
ده في الحقيقة هو النصاب اللي تمكن فعلا من الإستيلاء علي أكونت صاحبك أو الشخص المعرفة
وسيادتك وبحسن نية , أعطيته كلمة السر لحساب الواتس أب بتاعك
عشان أنت هتبقي الضحية الجديدة اللي هيتم الإستيلاء علي الأكونت بتاعها
طيب إيه المصلحة اللي النصاب ده بيعملها لما بيستولي علي حساب سيادتك !!؟
هو بيستفاد حاجتين
الإستفادة الأولي للنصاب: هو إنه يبعت لبعض أصدقائك بنفس الأسلوب اللي فوق عشان يعرف منهم الرقم السري لحساب الواتس أب وبالتالي يبقي حد فيهم الضحية الجديدة اللي هيستولي بها هو علي حسابه
الإستفادة الثانية للنصاب (وهي الأهم): إنه بيبعت رسالة لمعظم أصدقائك (علي أساس إن هو أنت) ومحتواها إنه بيشتري حاجة دلوقتي أون لاين ولكن بطاقته البنكية فيها مشكلة وهتتحل بعد ساعة .. وهيطلب بيانات البطاقة البنكية لأصدقائك عشان يدفع بها وهيبقي يرد لهم المبلغ بعد ساعة
للأسف , موضوع النصب والإحتيال بالشكل ده إنتشر جدا جدا جدا
وللأسف , في ناس فعلا بتبعت له الرقم السري بتاع أكونت الواتس أب بتاعها وبيتسرق منها الأكونت
وللأسف , في ناس كتير بتبعت بيانات البطاقة البنكية بتاعتها وبيتسرق من حسابها فلوس
يبقي التحذير للي لسه ما أتنصبش عليه هو
أوعي تبعت صورة رسالة الواتس أب (بتاعت الرقم السري) لأي حد مهما كان
وأوعي تبعت بيانات بطاقتك البنكية لأي حد مهما كان
أما لو فعلا إتنصب عليك وتم الإستيلاء فعلا علي أكونت الواتس أب بتاعك ومش عارف تخش عليه تاني , يبقي إعمل الأتي وبسرعة جدا جدا جدا
أولا: إبعت (إيميل) لكل من
android_web@support.whatsapp.com
iphone_web@support.whatsapp.com
ويكون موضوع الإيميل
Lost/Stolen: Pls deactivate my account
وأكتب فيه
My WhatsApp Account (Put your number including the Country Code) has been stolen.
Please deactivate my account immediately.
ثانيا: إبعت (رسالة نصية) لكل الناس اللي موجودين في الكونتاكت عندك ومكتوب فيها
أنا (فلان الفلاني) .. هناك نصاب إستولي علي حساب الواتس أب الخاص بي .. برجاء عدم التجاوب معه في أي شئ خصوصا فيما يخص تحويل الأموال .. ورجاء إعادة إرسال هذه الرسالة لأكبر عدد من أصدقائنا لتحذيرهم بسرعة
ثالثا: إستخدم باقي برامج السوشيال ميديا بتاعتك (الفيس بوك , تويتر .... إلخ) عشان تعلن عن سرقة أكونت الواتس أب بتاعك وتحذير أصدقائك
رابعا: إتصل أو إبعت أو زور المكان المخصص في البلد اللي انت فيها للإبلاغ عن الجرائم الإلكترونية
أما لو انت فعلا بعت بيانات بطاقتك البنكية لأي حد , يبقي إتصل فورا فورا بالبنك وأطلب منهم
أولا: وقف البطاقة البنكية
ثانيا: وقف وإلغاء أي تعاملات تمت بالبطاقة من ساعة فاتت
ثالثا: أطلب تغيير البطاقة وأستلام واحدة جديدة من البنك
إزاي تسترد أكونت الواتس أب ؟؟
بنسبة كبيرة للأسف , إن لما حسابك هيتسرق , مش هتعرف تسترده بسرعة
هتضطر تنتظر كذا ساعة لإستلام وإدخال الكود السري الجديد .. (بناءا علي العداد التنازلي اللي في الواتس)
عند إنتهاء العداد التنازلي هتلاقي إختيارين
واحد منهم: إستلام الكود الجديد عن طريق رسالة نصية
والثاني: إستلام الكود الجديد عن طريق مكالمة تليفون
أنا بأنصح بإستخدام الطريقة الثانية , اللي هي عن طريق مكالمة التليفون
لو لغتك الإنجليزية أوالفرنسية بعافية ومش أوي, يبقي خلي جنبك واحد صاحبك بيعرف إنجليزي وفرنساوي قبل ما تضغط علي الخدمة
عشان هو يسمع المكالمة الألية معاك ويقولك الرقم اللي سمعه
خلي بالك إن المكالمة هتوصلك بعد ثانية واحدة من طلبك
وممكن تبقي بالإنجليزية فقط ... وممكن تبقي بالفرنسية فقط
فمفيش مجال إنك تضييع المكالمة
أخيرا , يا ريت تاخد نسخة من كل الكلام اللي مكتوب فوق وتنشرها علي حسابات السوشيال ميديا بتاعتك (زي الفيس بوك وتويتر وإنستجرام ... إلخ) .... وطبعا إبعتها لكل الناس اللي تعرفها (واللي ماتعرفهاش) علي الواتس أب
دمتم بخير
شارك معنا برأيك