عمليات الابتزاز اللى بتحصل تحديدا للبنات وبعد ما اتكلمنا عن رسائل التصيد واللى بتوقع البنات (تحديداً) فى الفترة الاخيرة وبتتسبب فى النهاية فى سرقة حساباتهم وبالتالى تسريب معلوماتهم وصورهم الحساسة فى البوست دا: https://skty.cc/fv، اما فى البوست الحالى دا هنتكلم عن مشكلتين اساسيتين:
١. "انا موبايلى باظ وبمجرد ما رحت اعمله صيانه كل صورى الخاصة اتاخدت من عليه وتم ابتزازى بيها او اتحطت على صفحة على فيسبوك واللى حطها طالب منى فلوس".
٢. "موبايلى قدم وانا هجدده وقمت بايعاه واشتريت واحد جديد وبعدها بكام اسبوع كل صورى الخاصة اتاخدت من عليه وتم ابتزازى بيها او اتحطت على صفحة على فيسبوك واللى حطها طالب منى فلوس".
خلينا نتكلم الاول فى تفاصيل المشكلة:
المشكلة ببساطة ودون الدخول فى اى تعقيدات تقنية هى ان اى ملف بتحذفه فى الحقيقة متحذفش، والتعبير المناسب للحذف العادى هو "إعادة الكتابة" بمعنى ان الملف بتفضل تفاصيله ومحتواه موجودين على اى مساحة تخزينية سواء كانت داخلية فى التليفون نفسه او على SD Card او "كارت ميمورى" زى ما بنقول عليه ولما بتحذفيه بيتم اعادة الكتابة عليه ولكن موجود ويمكن استعادتة فى اى وقت، طيب علشان نتفادى مشكلة زى دى نتفاداها ازاى؟ فى اجراءات لازم تتاخد والاجراءات دى هقسمها لشقين اساسيين:
اولاً اجراءات احترازية تاخديها قبل ما يحصل موضوع زى دا وعلشان ميحصلش موضوع زى دا:
٠. متتصوريش اى صور خاصة من الاساس، اى صور بملابس داخلية حالية او ملابس داخلية جديدة او صور ما بعد الاستحمام او الصور اللى بتبين اجزاء فى جسمك هتتضايقى لو غيرك شافها بلاش منها، اسألى نفسك قبل ما تتصورى هل الصور دى لو حد تانى شافها ايه كمية المعاناه اللى هعانيها ساعتها؟ انا عارف ومتفهم ان دا تليفونك الشخصى وانه عامل زى الاوضه اللى مفيش حد شايفك فيها غيرك انما الاعتقاد دا مش صحيح بالمره، طالما الجهاز دا يقدر حد تانى من انه يحط ايده عليه ويوصله او متوصل بالانترنت ف إنتى + كل اللى على اللى يقدر يوصل للجهاز + كل اللى على الانترنت معرض انه يشوف اللى عليه ومش هقدر بردو انصحك بإنك تخزنى صور وبيانات حساسة زى دى على وسائل تخزين مش متصله بالانترنت لان ببساطة هييجى اليوم وتوصليها بالكمبيوتر واللى بدوره متوصل بالانترنت وساعتها لو الكمبيوتر مصاب اللى اصابه هيقدر يوصل لوسيلة التخزين دى وياخد منها اى بيانات حساسة طول ماهى متوصله، وبما ان الوقاية افضل من العلاج فمنتصورش خالص اى صور حساسة ولا نبعتها على فيسبوك ولا اى شئ وكمان لسبب بسيط هو ان الموبايل ممكن يضيع او يتسرق او ان الصور دى ممكن تكون على وسيلة تانية قابلة للاختراق.
"لا طبعا، دا جسمى وملكى وانا حره ودا موبايلى وانا اتصور براحتى ومحدش يمنعنى"
فرضيه صحيحه جداً ومش عيب ولا حرام بس سؤال: هل هتضمنى ان الموبايل ميخترقش او ميتسرقش او ميوصلش على الانترنت؟ الاجابة "اه"؟ يبقى نكمل:
١. فى حالة تجديد الموبايل لازم نحدد الاول هل الموبايل دا بيركبلة كارت ذاكرة خارجى؟ لو اه، شيلى كارت الذاكرة عندك لانه دا مش جزء الصفقة، اللى بيشترى الموبايل بيشترية بدون اى ذواكر خارجية وكروت الميمورى دى بتبقى حاجه شخصية فتشيليها بعيد واوعى تنسى حاجه زى دى، طيب الشارى دا مصمم انه يشترى التليفون ومعاه كارت الذاكرة الخارجى دا او ان الكارت دا شئ جوهرى فى اتمام صفقة البيع؟ يبقى هتعملى التالى: اولا هتركبى كارت الميمورى دا فى الكمبيوتر عادى جدا كإنك بتنقلى عليه اى نوع من البيانات فى الوضع الطبيعى وهتنزلى التطبيق دا: Easy File Shredder من هنا: https://skty.cc/fw وهتثبتى التطبيق على الكمبيوتر عادى جداً من خلال خطوات بسيطة بمجرد الضغط على Next Next وبعد التثبيت هتشغلى التطبيق واللى واجهته سهله جدا على فكره وبعدها هتختارى الاوبشن اللى بيخدم غرضك لان فيه اكتر من اوبشن، لو مش هتعرفى تعملى كل دا حاولى تخلى حد فاهم من قرايبك او الناس المقربين جدا ليكى يعمل حاجه زى دى (بالناس دول اقصد شخص بتثقى فيه جدا وتكونى متأكده انه مش هوا اللى ممكن يضرك ويفضل يكون والدك، اخوكى، اختك، ايهما اقرب وافضل فى فهم تعامله مع الكمبيوتر بشكل عام).
٢. فى حالة بيع كاريت الميمورى فقط؟ تطبق الخطوات الموجوده فى رقم ١ بردو.
٣. فى حالة انك هتبيعى التليفون بس بدون كارت الميمورى؟ فى الحالة دى لو تليفونك ابل ايفون فخطوة إعادة ضبط المصنع هتكون اكتر من كفاية لان موبايلات زى الايفون بتمسح البيانات بأمان لأنها بتكون متشفره بمفاتيح المالك السابق للتليفون ومحدش هيعرف يوصلها بنسبة ٨٥٪ (سبت ال ١٥٪ الباقيين للخبراء واللى مش هتلاقى منهم كتير بيقدروا يعملوا حاجه زى دى) اما لو تليفونك اى نوع تانى سامسونج، هواواى، شاومى، ال جى، اى تليفون بشكل عام بيشتغل بنظام اندرويد فهتدخلى على تطبيق متجر جوجل الرسمى Google Play "المكان الطبيعى العادى اللى بتنزلى منه التطبيقات" وبعدها هتبحثى عن تطبيق اسمه Secure Eraser ودا هتلاقيه موجود فى اللينك دا: https://skty.cc/fx او تطبيق Secure Wipe وهتلاقيه موجود فى اللينك دا: https://skty.cc/fy (حاولى تتأكدى من ان التطبيقات اللى بتكلم عليها واللى هتنزليها هيا نفسها الموجوده فى اللينكات اللى انا مخصصهالها علشان الموضوع فى اندرويد صداع الحقيقه بسبب التطبيقات المزيفة والمقلدة واللى بردو هتلاقيها موجوده على متجر جوجل الرسمى) وبعدها طريقة استخدام التطبيق نفسه سهله بس كل دا محتاج حبة تركيز لان ببساطة الاستخدام الخاطئ ليها ممكن يؤدى الى نتائج كارثية وبردو لو مش هتعرفى تعملى كل دا حاولى تخلى حد فاهم من قرايبك او الناس المقربين جدا ليكى يعمل حاجه زى دى (بالناس دول اقصد شخص بتثقى فيه جدا وتكونى متأكده انه مش هوا اللى ممكن يضرك ويفضل يكون والدك، اخوكى، اختك، ايهما اقرب وافضل فى فهم تعامله مع التليفون بشكل عام).
- طيب بالنسبة للحالات رقم ١ و ٢ و ٣ ومن منطلق "لا تعطنى سمكه بل علمنى كيف اصطاد" هيا ايه الفكرة؟
الفكرة بشكل عام اسمها shredding او "تمزيق" ودا معناه بدل ما بتقطع الورقة مرتين تلاته وترميها فى الزباله فييجى حد يجمعها ويلزقها ويحصل عليها من جديد، لا، التمزيق دا بيكون انه بيقطع الورقه ١٠٠ الف حته وبيترمى كل حبه منهم فى مكان مختلف، الفكرة بشكل عام زى ما قولت ممكن تبحثى عنها فى جوجل وتقرأى فيها كتير وتتعمقى علشان تعرفى هيا بتتم ازاى وتقدرى تطبقيها بنفسك سواء على تليفون، كمبيوتر، كارت ميمورى، هارد ديسك، لابتوب هيتباع، الخ... التطبيقات السابق ذكرها بتعمل اللى سبق وشرحته دا، فى مجال التقنية جملة "تمزيق الورقه ١٠٠ مره" دى بتعنى "اعادة الكتابة" على الملفات القديمه بحيث ان حتى لو حصل وتمت استعادتها ببساطة بترجع بايظه وغير قابلة للاستخدام، ونجاح التمزيق دا زى ما هوا بيعتمد على نجاح عدد مرات "التمزيق" فى الورق بيعتمد على عدد مرات "إعادة الكتابة" فى الملفات.
٤. فى حالة تليفونى فصل فجأة ومش قادره امسح بياناتى من عليه قبل ما اوديه يحصله صيانة؟ فى الحالة دى اسف جدا جدا لانى مش هقدر انصحك تعملى اى حاجه ودا ببساطة لانى مقدرش اثق فى ضمير اى شخص الايام دى، الكل بيبقى عايز يستغل الظروف وافضل شئ ممكن يتعمل فى حالة زى دى هيا ان الموبايل يتركن وتشترى موبايل غيره ومع ان دا حل غير عملى الا انه الاكثر واقعيه، مش هقولك ادى موبايلك لأخوكى واخوكى يديه لأقرب صديق فنى موبايلات يصلحه لان زى ما وضحت "مقدرش اثق فى ضمير اى شخص الايام دى،"
٥. فى حالة "طيب انا موبايل قبل ما اوديه للصيانة عملت كل اللى فات دا وبعته يتصلح وجالى؟"، فى الحالة دى بعد ما يجيلك موبايلك من الصيانة مينفعش كدا تركبى فيه شريحتك وتستخدمية بشكل عادى جدا، لا، لازم "تفرمتيه" بالبلدى او تعمليله "اعادة ضبط المصنع" او Factory Reset لانك متضمنيش حصل فيه ايه بعد ما اتصلح، وطبعا موضوع اعادة ضبطة للمصنع دى خطوات بتختلف من نوع موبايل للتانى وانصحك تكتبى الجملة دى فى جوجل اولا "كيفية اعادة ضبط مصنع " يليها نوع التليفون الخاص بيكى، يعنى على سبيل المثال معاكى تليفون من نوع Samsung Galaxy Note 10 هتكتبى التالى
- بالعربى: "كيفية اعادة ضبط مصنع Samsung Galaxy Note 10"
او
- بالانجليزى: "How to do factory reset for Samsung Galaxy Note 10"
وبعدها تتبعى الخطوات اللى هتلاقيها موجوده.
٦. طيب انا مبعملش ولا حاجه من اللى فاتت دى بس بكلم ماما او اختى او بنت عمى او اخويا او جوزى اللى شغال برا وواخده راحتى شوية على الكاميرا؟ بردو لا، انتى ممكن تكونى ضامنه موبايلك ومفهوش اى حاجه انما متضمنيش اللى بتكلمية دا مهما كان قريب تليفونه فيه ايه او ممكن يتسرب منه ايه ففى الحالة دى تعملى مكالمة الفيديو كأنك قاعده وسط ناس.
ثانياً اجراءات احترازية تاخديها بعد ما يحصل موضوع زى دا:
لا تبكى على اللبن المسكوب، خلاص المشكلة حصلت وافضل وسيلة معاكى هيا التركيز، اولا مفيش بنت حابه تتفضح وتبلغ مباحث الانترنت فى دولتها، لا قدر الله وحصل معاها موضوع زى دا كل اللى بتعمله اما الخضوع للمبتز او التكتيم التام او لا قدر الله التفكير فى افكار تانية ممكن تضر ها جسديا، فنركز فى الخطوات والاجراءات السليمة اللى ممكن تتعمل فى حاجه زى دى:
١. تبليغ مباحث الانترنت (حتى لو الموضوع بيحتاج اجراءات طويله وكتيره ومعقدة بس دا افضل اجراء ممكن يتعمل واكتر ناس ممكن تساعدك هيا الجهه دى)
٢. الابلاغ عن المحتوى: فى فيسبوك وحتى لو الموضوع اتسم بالبطئ وعدم الاستجابة فإبلاغك عن المحتوى بنفسك ومن حسابك الخاص هيدى للموضوع اهمية كبيرة اكتر من ان شخص تانى يقوم بيه نيابة عنك، فيسبوك يعرف عن حياتنا اكتر ما نعرف احنا، فيسبوك عارف شكلك، شكل اقربائك، الخ، الحساب الشخصى بتاعك بيبقاله تقل وسمعة فى فيسبوك لما بتبلغى منه افضل من ان اصحابك او اولاد عمك او اخواتك يبلغوا هما بنفسهم، حاولى تعملى دا ومتتجاهليش خطوه زى دى، عارف ان ممكن تكون البنت منهاره فى مرحلة زى دى بس حاولى تخلى اى حد من اخواتك يستخدم حسابك ويعمل حاجه زى دى على مرأى ومسمع منك.
٣. مفيش اى حاجه تانية تتعمل الا الصبر وانتظار نتائج الخطوتين السابقتين وعدم الخضوع للمبتز ولا حتى تسمعى لكلامه، دايما الرد على الفدية هى عدم دفعها ليه؟ هييجى حد يقولى ياعم ما تدفع علشان تلم الليلة دى ونخلص، للاسف اللى بيبتز مبيخلصش وبيبقى عايز وعايز وعايز والموضوع بالنسباله مبينتهيش خالص، فالافضل هو التجاهل!
اسئلة متداولة:
١. طيب انا عملت كل دا هل يقدر حد يستعيد الملف بعد كل اللى انا عملته دا؟
- اه بس بنسبة نجاح مبتتعداش ال ١٠٪
٢. انا مش عارفه اعمل الخطوات التقنية المذكوره فى البوست؟
- لو مش هتعرفى تعملى دا حاولى تخلى حد فاهم من قرايبك او الناس المقربين جدا ليكى يعمل حاجه زى دى (بالناس دول اقصد شخص بتثقى فيه جدا وتكونى متأكده انه مش هوا اللى ممكن يضرك ويفضل يكون والدك، اخوكى، اختك، ايهما اقرب وافضل فى فهم تعامله مع التكنولوجيا بشكل عام).
٣. فى ناس قالتلى بعد خطوة اعادة ضبط الهاتف للمصنع افتح الكاميرا واسجل فيديو بحيث تتملى ذاكرة التليفون بالكامل وبالتالى هبقى عملت اعادة الكتابة اللى شرحتها قبل كدا ايه رأيك فى الكلام دا؟
- الكلام دا صحيح بنسبة ضئيلة، فعلا تمت اعادة الكتابة بس تمت "مره واحده" واحنا قولنا قبل كدا ان نجاح عملية زى دى بيتناسب طردياً مع عدد مرات اعادة الكتابة.
٤. اخيراً وليس اخراً لو حابه تسألى سؤال وحاسة ان الكومنت بتاعك على البوست هنا ممكن يعرضك لاى نوع من المضايقات تقدرى تبعتلى السؤال على الايميل دا: sym@seekurity.com وهرد بمجرد ما يبقى عندى الوقت المتاح بكل تأكيد!
٥. الروابط المختصرة الموجوده فى البوست هنا دى روابط انا اقدر اضمنها لانها روابط من خدمة تقصيير الروابط فى شركتى الخاصة ومش موجوده على خدمات مواقع تانية!
٦. انتى strong independent women وتعرفى كل الكلام اللى فات دا؟ سواء على المستوى الشخصى او التقنى؟ يبقى البوست مش ليكى بس دا ميخليكيش غير مسؤولة عن مساعدة غيرك فلو عندك اى نصائح حابه اضيفها فى البوست دا هيكون شئ جميل ومفيد.
٧. الناس اللى فاكره ان كل المشاكل اللى ذكرتها فى البوست دى بتحصل بس حصرياً على البنات تبقى غلطانه، الموضوع موجة للبنات بإعتبارهم الغالبية العظمى اللى بيحصل معاها دا انما الاولاد والبنات سواسية فى الابتزاز، الابتزاز مبيعرفش لا دين ولا جنس ولا لون، كله بيقع ضحيته وفى النهاية اللى بيقع ضحيته اسمه "ضحية" مسموش بنت ولا ولد!
٨. (تحدد لاحقاً) لو فى اى حاجه تانية هبقى اضيفها بعدين!
اتمنى ان ميحصلش اى شئ من كل ما سبق لأى بنت. كونى قوية واهزمى الابتزاز!
Mohamed A. Basset
شارك معنا برأيك